Gjykata e Posaçme e Apelit për Korrupsionin dhe Krimin e Organizuar vendosi më 29 janar 2026 në Tiranë pezullimin e ekzekutimit të dënimit me burg për pesë ish-zyrtarë të Bashkisë së Tiranës, të përfshirë në një prej fraksioneve të dosjes së njohur si “5D”.
Trupa gjykuese, e kryesuar nga Miliana Muça, me anëtare Saida Dollani dhe Tereza Merkaj, la në fuqi vendimin e shkallës së parë, por ndryshoi mënyrën e ekzekutimit të dënimit.
Të pandehurit Eglantina, Enkelejda Qyta, Bruno Koçi, Rivjola Baxha dhe Kristo Zhulati u shpallën fajtorë për veprën penale “Shkelja e barazisë së pjesëmarrësve në tendera apo ankande publike”, kryer në bashkëpunim.
Apeli vendosi pezullimin e ekzekutimit të dënimeve me burg dhe vendosjen e tyre në shërbim prove për 12 muaj, me detyrimin për t’u paraqitur pranë Shërbimit të Provës dhe për të mos kryer vepra të tjera penale.
Gjithashtu, të pesëve u është hequr e drejta për të ushtruar funksione publike për një periudhë prej 5 vitesh.
Ndaj vendimit lejohet rekurs në Gjykatën e Lartë brenda 15 ditëve.