Gjykata e Apelit të Gjykatës së Posaçme kundër Korrupsionit dhe Krimit të Organizuar (GJKKO) ka lënë në fuqi vendimin e shkallës së parë për pezullimin e afateve të paraburgimit ndaj ish-presidentit Ilir Meta. Meta kishte kërkuar shfuqizimin e këtij vendimi, duke argumentuar se nuk ka munguar në seancat gjyqësore dhe se nuk ekzistojnë arsyet ligjore për një masë të tillë shtrënguese.
Ndërkohë, procesi gjyqësor për themelin e çështjes ndaj ish-presidentit është shtyrë për në datën 24 shtator 2026, ora 10:00. Shkak për këtë shtyrje është bërë mungesa e gjyqtares Rudina Palloj. Gjatë seancës, Meta ka parashtruar se nuk i janë vënë ende në dispozicion 77 fashikuj të tjerë të dosjes hetimore.
Ilir Meta ndodhet në paraburgim që prej muajit tetor të vitit 2024. Prokuroria e Posaçme (SPAK) ka ngritur ndaj tij akuza për veprat penale të korrupsionit, pastrimit të parave dhe fshehjes së pasurisë.