Gjykata e Posaçme e Apelit për Korrupsionin dhe Krimin e Organizuar, më 22 janar 2026, me trupën gjykuese të kryesuar nga Igerta Hysi dhe anëtaret Iliriana Olldashi dhe Tereza Merkaj, ka shpallur vendimin për çështjen penale nr. 2/66 akti, të regjistruar më 21 tetor 2025. Ky vendim i kundërvihet ankimave të të pandehurve J.M. (Jusel Mici) dhe M.D. (Mendim Domi) ndaj vendimit nr. 42, të datës 17 qershor 2025, të Gjykatës së Posaçme të Shkallës së Parë për Korrupsionin dhe Krimin e Organizuar (GJKKO).
Apeli ka prishur vendimin e GJKKO-së dhe e ka kthyer çështjen për rigjykim në shkallën e parë me një tjetër trupë gjykuese. GJKKO kishte deklaruar fajtor Jusel Micin për veprat penale "mashtrim kompjuterik" (nenet 143/b/2 dhe 334 pika 1 të Kodit Penal, 11 vite burgim), "grup i strukturuar kriminal" (neni 333/a/1, 3 vite), "pastrimi i produkteve të veprës penale" (neni 287 paragrafi i dytë, 7 vite) dhe "fshehja e të ardhurave" (neni 180/1, 3 muaj). Pas bashkimit të dënimeve në 12 vite dhe uljes me një të tretën, ai u dënua me 8 vite burgim në burgun e sigurisë së lartë. Gjithsej, për të dy të pandehurit, dënimi ishte 23 vite burgim.
GJKKO kishte urdhëruar konfiskimin e 14 pasurive të paluajtshme, midis të cilave 3 apartamente (dy të Micit dhe një i Domit), sipërfaqe të mëdha tokash bujqësore rreth 26 mijë metra katrorë dhe 3 llogari bankare të Domit me vlerë rreth 200 mijë euro. Gjithashtu u konfiskuan sendet e sekuestruara në subjektin "Telex" shpk.
Grupi kriminal, me bazë në Tiranë, u godit në dhjetor 2022, pas kërkesës së Prokurorisë së Pizës në Itali dhe koordinimit me Eurojust. Hetimet e Strukturës së Posaçme Kundër Korrupsionit dhe Krimit të Organizuar (SPAK), të nisura në 2021, vërtetuan se qytetarë italianë, spanjollë dhe gjermanë u mashtruan me telefonata për të investuar në instrumente financiare imagjinare, duke humbur mbi 15 milionë euro.