Gjykata e Posaçme e Shkallës së Parë për Korrupsionin dhe Krimin e Organizuar, me trup gjykues të përbërë nga gjyqtarët Erjon Bani, Atalanta Zeqiraj dhe Bib Ndreca, shpalli vendimin për 23 të pandehur në një proces të gjatë gjyqësor. Të akuzuarit ishin përfshirë në veprimtari të paligjshme për ndihmën në kalimin e kufijve, falsifikim dokumentesh dhe korrupsion gjatë periudhës 2023-prill 2024.
Sipas vendimit, drejtuesit kryesorë të grupit, Endri Seiti dhe Luan Tafalla, u dënuan me nga 8 vjet burgim secili, përmes procedurës së gjykimit të shkurtuar. Gjykata gjithashtu dha dënime të tjera për pjesën tjetër të të dënuarve, ku spikasin dënimet për Arnold Shpata dhe Tomë Preka me nga 6 vjet e 8 muaj burgim. Një numër i pandehurish të tjerë, ndër të cilët Endrit Ismailaj, Artur Mata, Luan Sulaj, Emmanuel Delphin Assako Ella, Shkëlzen Matmuja, Faik Matmuja, Bukurosh Muja, Lulzim Lami, Iglan Alliçi dhe Edmond Baklli, u dënuan me nga 6 vjet burgim.
Në procesin e gjykimit u përfshi edhe funksionari publik Altin Hasani, i cili u shpall fajtor për ndihmë në kalim të paligjshëm të kufijve duke shfrytëzuar funksionin shtetëror. Ai u dënua me 2 vjet e 6 muaj burgim, por u lirua menjëherë pasi koha e qëndrimit në paraburgim ishte e barabartë me dënimin e dhënë. Ndërkohë, katër persona të tjerë, mes të cilëve Edmond Braha dhe Artan Sulaj, u shpallën të pafajshëm nga trupi gjykues.
Hetimet zbuluan se emigrantët, kryesisht nga Bangladeshi dhe Kameruni, paguanin shuma të konsiderueshme parash për të kaluar kufirin. Pagesat kryheshin në Dubai dhe transferoheshin më pas në Shqipëri përmes sistemit të paligjshëm të transfertave "Hawala".