Gjykata e Posaçme e Shkallës së Parë për Korrupsionin dhe Krimin e Organizuar (GJKKO) shpalli fajtorë dhe dënoi shtatë anëtarë të grupeve kriminale të trafikut të klandestinëve, të cilët sulmuan me armë zjarri punonjësit e policisë kufitare në pikën Morinë të Kukësit më 25 maj 2023. Vendimi nr. 12, datë 10 shkurt 2026, u mor nga trupi gjykues me gjyqtarët Elsa Ulliri, Etleva Deda dhe Bib Ndreca, pas kërkesës së Prokurorisë së Posaçme kundër Korrupsionit dhe Krimit të Organizuar (SPAK).
Të dënuarit, pesë shtetas sirianë dhe dy algjerianë, u shpallën fajtorë për kryerjen e veprave penale të trafikut të qenieve njerëzore, si dhe për tentativën e vrasjes së punonjësve të policisë së shtetit, A.L. dhe J.Q., në bashkëpunim dhe në formën e grupit të strukturuar kriminal. Ngjarja ndodhi ndërsa policia monitoronte zonën për kapjen e personave të armatosur, ku të pandehurit hapën zjarr për të shpëtuar gjatë arratisjes, duke rrezikuar jetën e punonjësve dhe banorëve.
Të dënuarit dhe verdiktet
• Sultan Grimash alias Sadaak Guremache alias Junes Alma: 35 vite burgim.
• Ayoub Bahhoo: 35 vite burgim.
• Muhammed Radën alias Muhamed Radouë alias Radvan Radvan: 35 vite burgim.
• Rabi Lqadi alias Rabi El-Kadi: 8 vite burgim.
• Muhammed Shehab alias Mohamed Al Uthman Shaab alias Mohamed Outman: 35 vite burgim.
• Muhammed Nasir alias Nouh Graie: 12 vite burgim.
• Nagid Alabdalah alias Abu Gira: 8 vite burgim.
Të pandehurit vepronin në dy grupe kriminale që organizonin trafikun e klandestinëve nga Shqipëria nëpërmjet Kosovës drejt vendeve të Bashkimit Evropian. Ata kishin jetuar mes Morinës dhe Kosovës në vitin 2023, duke hyrë e dalë në mënyrë të paligjshme, mbajtur armë zjarri dhe bashkëpunuar me shqiptarë, kosovarë e të huaj të tjerë. Këta grupe bashkëpunonin me rrjete në Greqi, Turqi, Serbi e Gjermani. Një pjesë e tyre kishte qëndruar në Shqipëri që nga viti 2019, ishte kapur më herët me emigrantë duke dhënë identitete të rreme për të shmangur identifikimin si organizatorë.