Gjykata e Apelit të Kosovës ka ulur dënimin ndaj Tom Dodajt, i akuzuar për shitjen e armës me të cilën dyshohet se u vra Liridona Ademaj më 29 nëntor 2023 në një rrugë në fshatin Bërnicë të Prishtinës.
Dodaj, i cili pranoi fajësinë për shitjen paautorizuar të armëve, u dënua në shkurt të vitit 2025 nga gjykata e parë me pesë vjet burgim dhe 5 mijë euro gjobë. Gjykata e Apelit e konsideroi këtë dënim "të ashpër" dhe e uli në tre vjet burgim dhe 3 mijë euro gjobë.
Si faktorë lehtësues, gjykata përmendi pranimin e fajësisë nga Dodaj, kërkimfaljen ndaj familjes së viktimës, faktin se ai nuk kishte qenë në dijeni për përdorimin e armës dhe se kjo ishte hera e parë që bie ndesh me ligjin. Vendimi argumenton se edhe me dënim më të ulët arrihet qëllimi ndëshkimor sipas nenit 38 të Kodit të Procedurës Penale.
Avokati i Dodajt, Agron Kuçi, deklaroi se i mbrojturi i tij nuk i kishte njohur paraprakisht të pandehurit dhe e mësoi se armën që kishte shitur e përdorën për vrasje vetëm nga mediat pas ngjarjes.
Të akuzuarit për vrasje
Për vrasjen e Liridonës Ademaj, 30-vjeçare, po gjykohet bashkëshorti i saj Naim Murseli, Granit Pllana dhe Kushtrim Kokalla. Murseli dhe Kokalla janë deklaruar të pafajshëm, ndërsa Pllana nuk ka dhënë deklaratë për fajësinë.
Sipas aktakuzës së Prokurorisë, Murseli planifikoi vrasjen për hakmarrje dhe përfitim financiar nga një sigurim jetësor në Suedi në vlerë rreth 260 mijë eurosh. Ai dyshohet se bashkëpunoi me Kokallën dhe Pllanën, duke u premtuar atyre shpërblim.