Gjykata e Apelit ka ulur dënimin ndaj Tom Dodaj, i cili shiti armën me të cilën dyshohet se u vra Liridona Ademaj në nëntor të vitit 2023.
Gjykata Themelore e kishte dënuar më parë Dodaj me 5 vjet burgim dhe 5 mijë euro gjobë për veprën penale "Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse". Vendimi i Apelit, i marrë më 30 dhjetor 2025 dhe i publikuar më 14 janar 2026, e ul dënimin në 3 vjet burgim dhe 3 mijë euro gjobë.
Ky ndryshim erdhi pas ankesës së mbrojtësit të Dodaj, avokatit Agron Kuqi. Nëse gjoba nuk paguhet vullnetarisht, ajo konvertohet në burgim, ku për çdo 20 euro shtohet një ditë burgimi. Gjykata do t’i llogarisë Dodaj kohën e kaluar në paraburgim nga 9 dhjetori 2023 deri më 17 prill 2024.
Dodaj ia shiti armën Naim Murselit dhe Granit Plavës për 280 euro. Ai pranoi fajësinë dhe kërkoi falje, duke thënë se nuk ishte në dijeni se arma do të përdorej për vrasje.
Për vrasjen e Liridona Ademaj akuzohen bashkëshorti i saj Naim Murseli, Granit Plava si ekzekutor dhe Kushtrim Kokalla.