Në kuadër të shënimit të 20-vjetorit të themelimit, Agjencia për Parandalimin e Korrupsionit (APK) ka njoftuar se të enjten do të bëjë lansimin e një moduli elektronik trajnimi, të dedikuar për çështjet e etikës dhe konfliktit të interesit.
Ky modul është hartuar në bashkëpunim me Institutin e Kosovës për Administratë Publike (IKAP), me mbështetjen e partnerëve ndërkombëtarë. Qëllimi kryesor i nismës është avancimi i njohurive dhe forcimi i kapaciteteve profesionale të zyrtarëve publikë, duke kontribuar në kultivimin e integritetit në administratën publike.
Pas prezantimit, është planifikuar organizimi i një paneli diskutimi me pjesëmarrjen e përfaqësuesve të institucioneve publike, shoqërisë civile dhe partnerëve. Diskutimet do të fokusohen në rëndësinë e edukimit të vazhdueshëm dhe forcimin e kulturës së integritetit. Ky aktivitet përbën një prej ngjarjeve qendrore të "Javës së Agjencisë", që shënon dy dekada të veprimtarisë së APK-së.
Përditësime
Drejtori i APK, Yll Buleshkaj, njoftoi se moduli elektronik për etikën dhe konfliktin e interesit është funksional. Projekti është mbështetur nga Ambasada e Gjermanisë përmes GIZ-it. Trajnimi realizohet përmes një moduli 2-orësh, ndërsa pas përfundimit dhe testimit, pjesëmarrësit pajisen me certifikatë zyrtare.