Instituti Demokratik i Kosovës (KDI) ka vlerësuar miratimin në parim të Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme si një hap të rëndësishëm drejt forcimit të mekanizmave për luftimin e korrupsionit në Kosovë.
Në një kontekst ku konfiskimi penal i pasurisë së paligjshme ka qenë tejet i kufizuar dhe joefektiv ndër vite, krijimi i një mekanizmi funksional ku pasuria e pajustifikueshme mund të konfiskohet edhe përmes procedurës civile përbën zhvillim të rëndësishëm. Kjo qasje, e ndërtuar mbi baza të qarta ligjore dhe kushtetuese, mund të shërbejë si instrument kyç për trajtimin efektiv të pasurisë së pajustifikueshme dhe forcimin e besimit në sundimin e ligjit.
Rëndësia e projektligjit lidhet drejtpërdrejt me përmbajtjen që do të marrë gjatë shqyrtimit në Kuvend. Kjo nismë, e trajtuar për disa vite me ndërhyrje dhe rikthime pas vlerësimeve të Gjykatës Kushtetuese dhe Komisionit të Venecias, duhet të reflektojë plotësisht rekomandimet përkatëse. Versioni përfundimtar duhet të jetë i qartë, i zbatueshëm dhe në përputhje me garancitë kushtetuese.
Kuvendi ka përgjegjësinë kryesore që shqyrtimi i mëtejmë të zhvillohet si proces ligjvënës i mirëfilltë, me trajtim adekuat të amendamenteve, qasje të hapur ndaj ekspertizës profesionale dhe debat konstruktiv. KDI mbetet e gatshme të kontribuojë në këtë proces përmes ofrimit të ekspertizës dhe mbështetjes për organet përkatëse.