Në Kuvendin e Kosovës, më 17 prill 2026, nisi shqyrtimi i parë i Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme.
Ministrja e Drejtësisë, Donika Gërvalla, e prezantoi projektligjin si instrument me peshë të veçantë për sundimin e ligjit, rrugën drejt Bashkimit Evropian dhe besimin e qytetarëve në drejtësi. Ajo theksoi se funksioni publik nuk mund të shërbejë si mburojë për pasurim të pajustifikueshëm dhe se ligji synon zyrtarët publikë, jo qytetarët e zakonshëm.
Sipas Gërvallës, nisma ka histori të gjatë: konceptdokumenti u miratua më 13 prill 2021, u votua për herë të parë në Qeverinë Kurti 2 më 29 dhjetor 2021, kaloi nëpër tri opinione të Komisionit të Venedikut dhe dy shqyrtime të Gjykatës Kushtetuese. Asnjë nga këto institucione nuk e ka kontestuar konceptin e konfiskimit civil, por kanë kërkuar më shumë qartësi, proporcionalitet dhe garanci procedurale, të cilat janë reflektuar në tekst.
Gërvalla sqaroi se Byroja mbledh, verifikon dhe analizon informacionin mbi bazë të të dhënave kredibile, ndërsa vendimin për konfiskim e merr gjykata. Procedurat nuk nisin arbitrarisht dhe të drejtat e palëve garantohet në çdo fazë. Ajo cilësoi si propagandë pretendimet se ligji cenon qytetarët e zakonshëm dhe u bëri thirrje deputetëve ta miratojnë për të rreshtuar në anën e shtetit ligjor.
Vërejtjet e opozitës
Deputeti i Partisë Demokratike të Kosovës, Përparim Gruda, shfaqi vërejtje për projektligjin. Ai kritikoi mungesën e konsultimit publik para miratimit në Qeveri dhe propozoi ta organizojnë mes leximit të dytë dhe të tretë. Gruda theksoi se Gjykata Kushtetuese ka kërkuar rregullim me ligj, jo me akte nënligjore, dhe se mungon mekanizmi për kompensim efikas.
Ai vuri në dukje probleme në gjuhën juridike të ligjit dhe mos përputhje të titullit me përmbajtjen, pasi Byroja nuk konfiskon pasuri, por gjykata. PDK-ja nuk është kundër konceptit në parim, por kërkon ndryshime.
Përditësime
Kuvendi i Kosovës miratoi në leximin e parë projektligjin për Byronë e pasurisë së pajustifikueshme me 81 vota pro, 0 kundër dhe 25 abstenime, pas një debati të gjatë në seancën e së premtes. Projektligji është prioritet i kryeministrit Albin Kurti.
LVV dështoi në tentativën për të shkurtuar afatet për amendime të projektligjit për Byronë e Pasurisë së Pajtifikueshme.
Deputetët e LDK-së dhe AAK-së theksuan se nisma ka efekt elektoral.
Përparim Gruda (PDK) shpjegoi abstenimin: "Kundërshtojmë projektligjin sepse bie ndesh me Kushtetutën e Kosovës, duke cenuar parimet themelore të shtetit ligjor."