Kuvendi i Kosovës ka miratuar në shqyrtim të parë Projektligjin nr. 11/L-006 për Byronë Shtetërore dhe Verifikimin e Konfiskimit të Pasurisë së Pajustifikueshme. Votimi u realizua me 81 vota për, duke shënuar një mbështetje të plotë nga deputetët e pranishëm në sallë.
Ministrja e Drejtësisë, Donika Gërvalla-Schwarz, e cila prezantoi projektligjin para deputetëve, deklaroi se ky institucion do të ketë për detyrë të verifikojë, mbledhë dhe të paraqesë provat për pasuri të pajustifikueshme. Sipas saj, procesi i konfiskimit do të mbetet ekskluzivisht në kompetencë të Gjykatës, duke garantuar të drejtën e mbrojtjes për çdo person të përfshirë.
Nga radhët e Partisë Demokratike të Kosovës (PDK), shumica e deputetëve u larguan nga salla pak para votimit, në shenjë kundërshtimi pas mosmbështetjes së mocionit për votimin e Ligjit për Gjykatën Speciale në lexim të dytë. Megjithatë, deputeti Rrustem Mustafa ishte i vetmi nga ky grup parlamentar që qëndroi në sallë dhe votoi pro projektligjit.
Shefi i grupit parlamentar të Aleancës, Besnik Tahiri, gjatë diskutimeve kërkoi që ky ligj të mos kthehet në mjet të fushatës zgjedhore dhe të zbatohet konform kornizave të sundimit të ligjit, duke theksuar nevojën për llogaridhënie të çdo zyrtari publik. Pas votimit, kryetarja e Kuvendit, Albulena Haxhiu, udhëzoi Komisionin për Legjislacion dhe komisionet e tjera të përhershme që ta shqyrtojnë projektligjin dhe t’i paraqesin Kuvendit raportet përkatëse me rekomandime për hapat në vijim.