Deputeti i Lidhjes Demokratike të Kosovës (LDK), Arben Gashi, ka reaguar përmes një postimi në rrjetet sociale lidhur me tensionet e vazhdueshme në Kuvendin e Kosovës. Në komentin e tij, ai ka shprehur shqetësimin se bllokimi i institucionit dhe klima politike aktuale po e çojnë situatën drejt përplasjeve fizike mes deputetëve.
Gashi vlerëson se në këtë moment të vështirë, LDK-së po i mungon një qëndrim i qartë dhe i vendosur. Sipas tij, vendit i nevojitet më shumë dialog, maturi dhe angazhim për shtetin dhe Republikën. Ai theksoi se aktualisht po mungon fryma Rugoviane, e cila është thelbësore për zgjidhjen e krizave institucionale.
"Në fakt, Kosovës po i mungon LDK-ja. Po i mungon fryma Rugoviane. Sepse kur institucionet bllokohen dhe tensionet rriten, Kosovës i duhet më shumë dialog, maturi, shtet dhe Republikë. Është koha që LDK-ja të flasë", ka shkruar Gashi.
Aktualisht, puna në Kuvendin e Kosovës mbetet e bllokuar, ndërsa vazhdon insistimi për mbajtjen e seancës konstituive. Sipas raportimeve, deputetët e LDK-së nuk janë parë në sallën e Kuvendit, ndërkohë që kërkesat për vazhdimin e procedurave parlamentare nga subjektet e tjera politike mbeten të paadresuara.