Deputeti i Lidhjes Demokratike të Kosovës (LDK), Arben Gashi, është deklaruar për mediat para fillimit të punimeve të Kuvendit të Jashtëzakonshëm të kësaj partie. Ai u shpreh optimist për zhvillimin e procesit, duke e vlerësuar atë si demokratik dhe të suksesshëm.
Sipas Gashit, ky kuvend shënon një nivel të ri të politikbërjes brenda strukturave partiake në Kosovë. Lidhur me pyetjet për kandidaturat për kryetar të LDK-së, deputeti mbajti një qëndrim të përmbajtur, duke sqaruar se në këtë fazë fokusi nuk është te emrat.
“Mendoj se do të jetë një proces demokratik dhe i suksesshëm. Nuk flasim sot për kandidatët, sot është hapi i parë, duhet të mblidhemi bashkërisht të gjithë dhe të vendosim”, deklaroi Gashi.
I pyetur mbi mundësinë e ushtrimit të ndonjë presioni ndaj tij në lidhje me pozicionet brenda partisë apo kandidaturat, deputeti e mohoi kategorikisht një mundësi të tillë, duke u përgjigjur me ironi: “Po thua që më bën dikush presion mua, a?”. Lidhur me ambiciet e tij për postin e kryetarit, ai theksoi se fillimisht duhet të përmbyllet hapi i parë i procesit, duke shtuar: “Ta shohim hapin e parë, pastaj flasim”.