Kandidati i Aleancës për kryeministër, Ardian Gjini, ka deklaruar se shkalla e lartë e abstenimit në zgjedhjet e fundit përfaqëson një mesazh të qartë politik. Gjatë pjesëmarrjes së tij në emisionin "Rubikon" në Klan Kosova, ai theksoi se kjo dukuri nuk duhet të trajtohet thjesht si mospjesëmarrje, por si një reagim i qëllimshëm i qytetarëve ndaj zhvillimeve politike në vend.
Sipas Gjinit, një pjesë e elektoratit ka zgjedhur të mos votojë si formë proteste ndaj stagnimit të vazhdueshëm dhe ngërçit institucional që, sipas tij, po e përcjell Kosovën prej më shumë se një viti e gjysmë.
"Unë mendoj që ata e kanë dërguar një mesazh dhe mesazhin duhet ta lexojë drejt çdokush", u shpreh Gjini, duke shtuar se subjekti i tij politik po përpiqet të analizojë me kujdes këto të dhëna për të kuptuar kërkesat e votuesve.