Kandidati për kryeministër të Kosovës nga radhët e Aleancës për Ardhmërinë e Kosovës (AAK), Ardian Gjini, ka votuar sot në procesin zgjedhor. Ai e ka ushtruar të drejtën e tij të votës në qendrën më të madhe të votimit në komunën e Gjakovës, në shkollën fillore Fehmi Agani, ku janë të regjistruar mbi 9,800 votues.
Pas votimit, Gjini u deklarua për mediat duke ftuar qytetarët që të marrin pjesë në zgjedhje. "Sot është një ditë e mirë. I ftoj qytetarët e Kosovës të dalin të votojnë dhe ta marrin Kosovën në duart e veta. Kosova u përket vetëm qytetarëve dhe ata duhet ta thonë fjalën e tyre sot", theksoi ai, duke shprehur shpresën se ky proces do të sjellë ditë më të mira për vendin.
Në komunën e Gjakovës, procesi zgjedhor po zhvillohet në 36 vendvotime të rregullta dhe një vendvotim me kusht, ku të drejtën për të votuar e gëzojnë mbi 118 mijë qytetarë.