Kryetari i KQZ-së, Kreshnik Radoniqi, ka votuar mëngjesin e sotëm në shkollën fillore “Lidhja e Prizrenit” në Pejë. Pas ushtrimit të së drejtës së votës, ai ka konfirmuar se të gjitha përgatitjet logjistike dhe procedurale për këtë proces zgjedhor janë përmbyllur me kohë nga institucioni që ai drejton.
Radoniqi u ka bërë thirrje qytetarëve të Republikës së Kosovës që të marrin pjesë në zgjedhje dhe të shfrytëzojnë të drejtën e tyre kushtetuese për të përcaktuar përfaqësuesit e ardhshëm në legjislativ. Kreu i KQZ-së ka kërkuar nga qytetarët dhe të gjithë akterët e përfshirë në proces që të respektojnë ligjin dhe rregullat zgjedhore, me qëllim që procesi të zhvillohet në një frymë demokratike.
Gjatë deklaratës së tij, Radoniqi ka theksuar se votimi ka nisur në orën 07:00 në të gjithë territorin e vendit, ndërsa vuri në dukje se votimi në përfaqësitë diplomatike të Kosovës ishte kryer ditën e mëparshme. Procesi i numërimit të votave pritet të zhvillohet në qendrat komunale të numërimit pas përfundimit të procesit zgjedhor.