Kryetari i Aleancës për Ardhmërinë e Kosovës (AAK), Ardian Gjini, ka zhvilluar një takim të përbashkët me ish-kandidatët për deputetë që garuan në zgjedhjet e 7 qershorit. Në këtë takim, ai falënderoi bashkëpunëtorët për angazhimin dhe energjinë e treguar gjatë gjithë fushatës zgjedhore.
Përmes një postimi në rrjetin social Facebook, Gjini bëri të ditur se është zhvilluar një diskutim përmbajtësor mbi procesin zgjedhor dhe rezultatin e arritur nga partia. Sipas tij, AAK hyri në garë me një listë cilësore kandidatësh dhe një program që u vlerësua nga qytetarët, duke sjellë kështu rritjen e votës së përgjithshme për këtë subjekt politik.
Gjatë takimit u diskutuan edhe angazhimet e ardhshme për organizimin dhe fuqizimin e mëtejshëm të strukturave të partisë. Gjini nënvizoi se besimi i marrë nga qytetarët përbën një përgjegjësi për të vazhduar punën me përkushtim në shërbim të vendit.