Pal Lekaj, nënkryetar i Aleancës për Ardhmërinë e Kosovës (AAK), ka bërë të ditur se nuk do të garojë si kandidat për deputet në zgjedhjet e 7 qershorit.
Në një postim në Facebook, Lekaj shpjegon se pas 26 vitesh angazhim në parti ka vendosur të hapë rrugë anëtarëve të rinj. Ai premton mbështetje absolute dhe angazhim më të madh për AAK-në dhe kandidatin për kryeministër Ardian Gjini.
Lekaj e cilëson AAK-në si familje politike me kontribut të madh në shtetformim, zhvillim dhe siguri të Kosovës. Ai e vlerëson lartë liderin Ramush Haradinaj si ideator dhe luftëtar kryesor të pavarësisë.
"Aleanca për Ardhmërinë e Kosovës nuk është thjesht një grupim politik, por një familje politike", shkruan Lekaj.
Ai u bën thirrje strukturave, simpatizantëve dhe mbështetësve të AAK-së të punojnë për fitoren në zgjedhje, duke e quajtur Haradinaj "shtyllë dhe themel" të partisë.