Ardita Sinani, kryetarja e Preshevës, votoi të dielën, më 25 tetor, në zgjedhjet e parakohshme parlamentare në Serbi dhe u bëri thirrje qytetarëve shqiptarë të Luginës së Preshevës, Bujanocit dhe Medvegjës të dalin masivisht në votime.
Sinani tha se dita është vendimtare dhe jetike për të ardhmen e shqiptarëve të Luginës së Preshevës dhe të rajonit. Ajo u kërkoi qytetarëve të mos hezitojnë, të ushtrojnë të drejtën e votës dhe të shkojnë në votime së bashku me familjarët.
“Unë ftoj masivisht qytetarët të dalin sot, të shfrytëzojnë të drejtën e votës. Dita e sotme është vendimtare, është jetike për të ardhmen, jo vetëm të rajonit, por kryesisht për shqiptarët e Luginës së Preshevës. Andaj mos hezitoni, dilni me të gjithë anëtarët e familjes dhe përgjigjuni ditës së sotme”, tha Sinani.
Ajo e cilësoi procesin zgjedhor si “referendum në vete” dhe përsëriti thirrjen për pjesëmarrje të gjerë.
“Sot ky proces zgjedhor mendoj se është referendum në vete, andaj dilni masivisht”, tha Sinani.
Zgjedhjet e parakohshme parlamentare po zhvillohen në Serbi. Shqiptarët po garojnë përmes një liste të përbashkët, me synimin për të siguruar tri mandate në Kuvendin e Serbisë. Në votime marrin pjesë qytetarë nga Presheva, Bujanoci dhe Medvegja.