Kombëtarja e Argjentinës ka mbërritur në Kansas City, në shtetin e Missouri, ku do të zhvillojë fazën përgatitore përpara fillimit të Kupës së Botës 2026. Skuadra e cila mbron titullin e fituar në Katar 2022, kreu një fluturim 11-orësh nga Buenos Aires për të mbërritur në tokën amerikane.
Avioni i përdorur për këtë udhëtim, një Airbus A330 i kompanisë Aerolíneas Argentinas, tërhoqi vëmendjen për dizajnin e veçantë. Në bishtin e mjetit fluturues është vendosur numri 10 i kapitenit Lionel Messi, ndërsa dizajni përfshin detaje të historisë së vendit në botërorë, përfshirë tre yje që simbolizojnë triumfet në vitet 1978, 1986 dhe 2022. Numri i fluturimit, 1978, shërben si homazh për titullin e parë botëror të fituar nga skuadra në shtëpi kundër Holandës.
Argjentina është përfaqësuesja e parë që mbërrin në qendrën e akomodimit në Kansas City, ndërsa gjatë kësaj jave pritet të vijnë edhe ekipet e Anglisë, Holandës dhe Algjerisë. Përpara ndeshjes hapëse të turneut, kampionët e botës do të zhvillojnë dy takime miqësore kundër Hondurasit dhe Islandës.
Stafi teknik, i udhëhequr nga Lionel Scaloni, ka planifikuar një program stërvitor për ditët në vijim, që do të nisë me seanca të lehta për t'u përshtatur me ambientin e ri.