Këngëtarja amerikane Ariana Grande ka ndërmarrë veprime ligjore përmes një padie të depozituar në Los Angeles kundër dy hakerëve, të cilët referohen si John Doe. Ajo i akuzon ata për qasje të paautorizuar në pajisjet e bashkëpunëtorëve të saj, si producentë dhe teknikë, me qëllim vjedhjen e materialeve muzikore, fotografive dhe videove që nuk ishin destinuar për publikun.
Sipas dokumenteve gjyqësore, materialet e vjedhura janë tregtuar në të ashtuquajturin “dark web” për shuma të konsiderueshme parash. Përveç publikimit të 45 këngëve në vitin 2023, padia thekson se rrjedhje të ngjashme janë regjistruar që nga fillimi i karrierës së Grandes në vitin 2011. Në padi detajohen metoda të ndryshme të përdorura nga autorët, siç është hakimi i telefonit të një producenti në vitin 2025 për të siguruar demo dhe incizime origjinale, si dhe përdorimi i adresave elektronike të rreme për të mashtruar një teknik imazhi në vitin 2024.
Ekipi ligjor i artistes e cilëson këtë veprimtari si shkelje të rëndë të privatësisë, thyerje të ligjeve të Kalifornisë mbi aksesin e paligjshëm në rrjete kompjuterike dhe përvetësim të padrejtë të pronës intelektuale. Grande deklaroi se këto veprime kanë minuar marrëdhënien e besimit me publikun dhe kanë dëmtuar rrugëtimin e saj profesional. Këngëtarja kishte shprehur më parë shqetësimin e saj lidhur me publikimin e paligjshëm të materialeve, ku gjatë vitit 2024, pas rrjedhjes së këngës “Fantasize”, ajo u zotua se do të ndiqte përgjegjësit deri në vendosjen e tyre para drejtësisë.
Aktualisht, 33-vjeçarja ndodhet në një turne ndërkombëtar për promovimin e albumit të saj të shtatë, “Eternal Sunshine”, i cili do të përmbyllet më 1 shtator në O2 Arena në Londër.