Pas publikimit të pamjeve nga mediumi Sinjali, ku këngëtari Gjesti shihet duke hyrë me armë në dorë dhe duke shkaktuar dëmtime në ambientet e shtëpisë muzikore ONIMA, artisti ka publikuar një deklaratë sqaruese në rrjetet sociale. Ai ka mohuar vërtetësinë e pamjeve, duke i cilësuar ato si materiale të manipuluara dhe të prera qëllimisht për të dëmtuar imazhin e tij.
Sipas Gjestit, incidenti erdhi si pasojë e mosmarrëveshjeve për të ardhurat financiare nga puna e tij artistike. Ai pretendon se arma i ishte drejtuar atij fillimisht dhe theksoi se reagimi i qetë i stafit në video tregon se nuk kishte rrezik real për jetën e tyre.
Krahas incidentit, këngëtari ka hedhur akuza të rënda ndaj pronarit të kompanisë, Erkand Shabani, për falsifikim të nënshkrimit dhe përfitim të paligjshëm nga veprimtaria e tij muzikore ndër vite. Gjesti u ka kërkuar falje publikut për shqetësimin e krijuar, duke theksuar se e pranon përgjegjësinë e tij ligjore për veprimet e bëra.
Ai ka shprehur besim te organet e rendit dhe të drejtësisë në Kosovë, duke shtuar se kanë nisur hetime edhe ndaj palës tjetër të përfshirë në konflikt.