Avokati Arianit Koci ka kërkuar angazhim të drejtpërdrejtë institucional për shkak të pritjeve të gjata dhe bllokimit të mërgimtarëve kosovarë në kufirin ndërmjet Kroacisë dhe Serbisë.
Përmes një reagimi në rrjetet sociale, Koci ka ftuar Ministrin e Punëve të Jashtme të Kosovës, zëvendësministrin, si dhe ambasadorin e Kosovës në Kroaci që të jenë fizikisht pranë bashkatdhetarëve deri në tejkalimin e problemit.
"Kroacia është shtet mik dhe, kur e sheh që vetë ministri apo së paku zëvendësministri po interesohet për qytetarët e vet, besoj se bën çmos për lirimin e kufirit", ka shkruar Koci.
Ai ka theksuar se detyra primare e politikanëve është shërbimi ndaj qytetarëve, veçanërisht në situata kur ata përballen me vështirësi gjatë udhëtimit për në Kosovë. Sipas tij, prania e zyrtarëve të lartë në zonën e kufirit do të ndihmonte në koordinimin me autoritetet vendase dhe do të përshpejtonte zgjidhjen e situatës.