Shtetasi i Republikës së Kosovës, Mentor Mustafa, 44 vjeç, nga fshati Jasenovik i Komunës së Novobërdës, është ndaluar nga autoritetet kufitare të Serbisë. Ndalimi është regjistruar mbrëmjen e së shtunës, rreth orës 22:30, teksa ai po udhëtonte me autobus nga Stuttgarti i Gjermanisë në drejtim të Kosovës.
Sipas informacioneve të bëra publike nga avokati Arianit Koci, i cili u njoftua për rastin pas mesnatës, Mentor Mustafa po udhëtonte në shoqërinë e vëllait të tij, Fejzullah Mustafa. Ky i fundit, i pranishëm gjatë ndalimit, ka deklaruar se autoritetet kufitare serbe e kanë arsyetuar masën me gjendjen e letërnjoftimit të shtetasit kosovar, duke e cilësuar atë si të dëmtuar.
Avokati Arianit Koci ka deklaruar se ka nisur menjëherë angazhimin për të sqaruar rrethanat e ndalimit dhe për t’i siguruar Mentor Mustafës ndihmën juridike të nevojshme. Ai theksoi se do të përdorë të gjitha mundësitë dhe kompetencat për të ndihmuar në zgjidhjen sa më të shpejtë të këtij rasti, duke shtuar se asnjë qytetar i Kosovës nuk duhet të ndihet i braktisur kur përballet me vështirësi jashtë vendit. Ky ndalim shënon një tjetër rast të raportuar të ndalimit të shtetasve të Kosovës nga autoritetet e Serbisë gjatë udhëtimeve tranzit nëpër territorin e këtij vendi.
Përditësime
Ministria e Punëve të Jashtme dhe Diasporës e Kosovës u ka bërë thirrje qytetarëve që të shmangin kalimin përmes territorit të Serbisë, duke këshilluar përdorimin e rrugëve alternative. Kjo kërkesë vjen pas rasteve të shpeshta të ndalimit të shtetasve kosovarë nga autoritetet serbe, përfshirë incidentin e fundit në kufirin me Hungarinë.