Rreth orës 11:00 të 5 shkurtit 2026, gjatë kalimit transit nëpër territorin e Serbisë, shtetasi i Kosovës Mit’hat Lozhani, ish-ushtar i UÇK-së, u ndalua dhe u arrestua nga policia serbe. Lajmin e ka bërë të ditur avokati i tij, Arianit Koci, i cili po e trajton çështën dhe planifikon të nisë drejt Serbisë.
Avokati Koci thekson se ky nuk është rast i izoluar. Arrestimet e shtetasve të Kosovës gjatë transitit në Serbi po përsëriten dhe krijojnë pasiguri reale për udhëtarët. Ai kërkon që këto ndalime të ndalen menjëherë.
Sipas Kocit, shteti i Kosovës ka detyrim ta trajtojë situatën si çështje serioze të sigurisë së qytetarëve. Ai propozon kërkesën për ndërmjetësimin e bashkësisë ndërkombëtare dhe reagim të fuqishëm të diplomacisë kosovare, pa përjashtuar masa politike konkrete, si mbylljen 24-orëshe të kufirit nëse praktika vazhdon.
Koci shton se, në cilësinë e avokatit, po bën maksimumin e mundshëm, por mbrojtja efektive e qytetarëve nuk mund të mbështetet vetëm në nivel individual. Kjo është përgjegjësi e shtetit të Kosovës, si brenda ashtu edhe jashtë kufijve të tij.
Konteksti i arrestimeve
Nga qershori deri në dhjetorin 2025, Serbia ka arrestuar 8 qytetarë shqiptarë të Kosovës. Këto arrestime synojnë kryesisht ish-pjesëtarë të Ushtrisë Çlirimtare të Kosovës, anëtarë të organeve të sigurisë si policë dhe ushtarë të Forcës së Sigurisë së Kosovës, si dhe qytetarë serbë që Beogradi i konsideron bashkëpunëtorë të institucioneve kosovare.