Ish-pjesëtari i Ushtrisë Çlirimtare të Kosovës Mit’hat Lozhani u lirua të martën nga burgu në Beograd. Lajmin e bëri të ditur avokati i tij Arianit Koci përmes një postimi në Facebook.
“Lajm i madh: Mit’hat Lozhani u lirua nga burgu në Beograd! Vazhdoj me punu për qytetarin e Kosovës”, shkroi Koci.
Lozhani u arrestua më 5 shkurt 2026 në kufirin mes Serbisë dhe Kroacisë, ose gjatë kalimit transit në Serbi, sipas burimeve të ndryshme. Gjatë kontrollit, autoritetet serbe i gjetën në xhep kartën e anëtarësisë si veteran i UÇK-së.
Autoritetet serbe e arrestuan nën dyshimin për pjesëmarrje në sulme ndaj forcave të Ministrisë së Punëve të Brendshme dhe Ushtrisë së Jugosllavisë në vitet 1998-1999 në zonën e Dukagjinit. Arrestimi ndodhi rreth tre muaj më parë.
Ditë më parë, Arianit Koci kishte njoftuar se Lozhani nuk ishte në gjendje të mirë shëndetësore dhe e kishin vendosur në një repart me ish-pjesëtarë të grupit të Arkanit. Pas arrestimit, avokati kërkoi reagim të menjëhershëm nga institucionet kosovare.