Ministria e Punëve të Jashtme dhe Diasporës (MPJD) e Kosovës ka njoftuar se ka ndërmarrë veprime institucionale pas arrestimit të shtetasit kosovar Mit’hat Llozhanit, ish-ushtar i Ushtrisë Çlirimtare të Kosovës (UÇK), në pikën kufitare Batrovci të Serbisë, në kufi me Kroacinë.
Zyra Ndërlidhëse e Republikës së Kosovës në Serbi ka adresuar një kërkesë zyrtare pranë Zyrës Ndërlidhëse të Serbisë në Kosovë për konfirmimin e arrestimit, sqarimin e arsyeve konkrete të ndalimit dhe të dhëna të tjera relevante për trajtimin e rastit.
Po ashtu, Zyra Ndërlidhëse e Kosovës në Serbi ka njoftuar Delegacionin e Bashkimit Evropian në Serbi dhe ka dërguar nota verbale pranë misioneve diplomatike të vendeve të Quint-it të akredituara në Serbi. Këto veprime synojnë angazhimin e partnerëve ndërkombëtarë për mbrojtjen e të drejtave dhe sigurisë së shtetasit kosovar.
Ambasadori i Kosovës në Serbi, Jetish Jashari, është në kontakt të vazhdueshëm me familjen e të arrestuarit dhe do të paraqesë kërkesë zyrtare për lejimin e vizitës përmes Zyrës Ndërlidhëse.
MPJD i bën thirrje Bashkësisë Ndërkombëtare të rrisë presionin ndaj autoriteteve serbe, të cilat vazhdojnë praktikën e arrestimit dhe keqtrajtimit të shtetasve kosovarë, duke cenuar normat dhe standardet ndërkombëtare për të drejtat e njeriut.
Përditësime
Autoritetet serbe e dyshojnë Mit’hat Llozhanin për krime lufte ndaj popullsisë civile.
Zhvillimet kryesore:
- Policia gjeti kartën e anëtarësisë si veteran i UÇK-së në xhepin e tij gjatë kontrollit.
- OVL e UÇK-së kërkon shmangien e udhëtimeve në Serbi.
- Arrestimi ndodhi të enjten.