Autoritetet gjyqësore të Serbisë kanë iniciuar procedurë penale ndaj shtetasit të Republikës së Kosovës, Dukagjin Maxhuni, të cilit i është shqiptuar masa e paraburgimit prej 30 ditësh. Sipas autoriteteve serbe, Maxhuni dyshohet për përfshirje në krime lufte të vitit 1999, konkretisht për krime ndaj anëtarëve të dy familjeve në fshatin Bec të Gjakovës.
Ministria e Punëve të Jashtme dhe Diasporës (MPJD) e Kosovës njoftoi se ka ndërmarrë veprime të menjëhershme diplomatike përmes Zyrës Ndërlidhëse në Serbi. Institucioni ka vënë në dijeni Delegacionin e Bashkimit Evropian në Serbi dhe ka dërguar nota verbale pranë misioneve diplomatike të vendeve të QUINT-it, me qëllim sigurimin e mbrojtjes së të drejtave dhe sigurisë së shtetasit të arrestuar. Arrestimi i Maxhunit thuhet se ka ndodhur në kufirin ndërmjet Serbisë dhe Kroacisë.
Ambasadori i Republikës së Kosovës në Serbi, Jetish Jashari, ndodhet në kontakt të vazhdueshëm me familjen e të arrestuarit. Nëpërmjet Zyrës Ndërlidhëse, pritet të dorëzohet kërkesa zyrtare për lejimin e vizitës së familjarëve, e cila parashikohet të realizohet gjatë javës në vijim.
MPJD-ja deklaroi se do të vijojë monitorimin e afërt të këtij rasti dhe do të përdorë të gjitha instrumentet diplomatike në dispozicion për mbrojtjen e të drejtave të shtetasve të Republikës së Kosovës.