Shtetasi i Kosovës, Dugagjin Maxhuni, nga fshati Bec i komunës së Gjakovës, është ndaluar nga autoritetet serbe gjatë kalimit në pikën kufitare ndërmjet Serbisë dhe Kroacisë. Rasti është bërë i ditur nga avokati Arianit Koci, i cili po ndjek nga afër procedurat ligjore që po zhvillohen ndaj tij.
Sipas informacioneve të konfirmuara, Maxhuni, i lindur më 10 maj 1979, ishte ndaluar fillimisht për verifikim rutinë nga autoritetet kufitare. Pas disa orësh, familjarët e tij janë njoftuar se ai është transferuar drejt kryeqytetit serb, Beograd, ku po vazhdojnë procedurat përkatëse. Avokati Koci theksoi se aktualisht nuk janë të qarta rrethanat dhe baza juridike e këtij ndalimi, ndërsa është zotuar se do të vazhdojë verifikimin e hollësive të rastit.
Në një reagim publik, avokati Koci kritikoi qasjen e politikës vendase për situatat e tilla. Ai u bëri thirrje institucioneve të shtetit të Kosovës që të angazhohen më seriozisht për mbrojtjen dhe kujdesin ndaj qytetarëve të tyre, duke u shprehur se ndërkohë që politika merret me përplasje të brendshme, Serbia po vazhdon me arrestimin e qytetarëve kosovarë. Koci ka paralajmëruar se do të mbajë të informuar opinionin publik për çdo zhvillim të ri që mund të shfaqet në lidhje me këtë rast.
Përditësime
Autoritetet serbe kanë ngritur zyrtarisht akuza për krime lufte ndaj Dugagjin Maxhunit, shtetasit kosovar nga fshati Bec i Gjakovës. Prokuroria serbe pretendon se i ndaluari ka marrë pjesë në dëbimin e popullsisë serbe si pjesëtar i Ushtrisë Çlirimtare të Kosovës (UÇK). Avokati Arianit Koci hodhi poshtë këto akuza, duke konfirmuar se Maxhuni kurrë nuk ka qenë pjesë e UÇK-së. Sipas mbrojtjes, vetë Maxhuni ishte viktimë e dëbimit nga forcat serbe gjatë luftës, periudhë gjatë së cilës ai u shpërngul për në Shqipëri.