Avokati Arianit Koci u ka bërë thirrje ekipeve ligjore të ish-presidentit të Kosovës, Hashim Thaçi, dhe të akuzuarve të tjerë në Gjykatën Speciale në Hagë, që të dalin publikisht dhe të japin sqarime mbi përfundimin e procesit gjyqësor. Përmes një postimi në rrjetet sociale, Koci kërkoi përgjigje konkrete për arsyet që çuan në dënimet e shqiptuara, duke ngritur pikëpyetje për mungesën e sinjaleve paraprake gjatë zhvillimit të seancave.
Sipas avokatit, përderisa interpretimet politike mbeten çështje të brendshme, nga ekipet mbrojtëse kërkohet një qëndrim profesional, i qartë dhe konkret. Koci argumentoi se ky shpjegim përbën një detyrim moral dhe ligjor ndaj qytetarëve, pasi avokatët kanë përfaqësuar figura të larta shtetërore të Kosovës.
Në postimin e tij, avokati rikujtoi mbështetjen e konsiderueshme financiare të shtetit për këtë proces. Sipas të dhënave të cituara, për mbrojtjen juridike të të gjithë të akuzuarve dhe të dyshuarve nga Haga janë ndarë deri më tani rreth 40 milionë euro nga buxheti i Kosovës. Prej kësaj shume, mbështetja për katër ish-krerët e UÇK-së vlerësohet të jetë rreth 28.5 milionë euro.