Arianit Salihu u emërua Zëvendëskryeprokuror i Prokurorisë Themelore në Prishtinë gjatë takimit të 290-të të Këshillit Prokurorial të Kosovës të enjten. Vendimi u mor me 5 vota për, asnjë kundër dhe asnjë abstenim. Rekomandimin e kishte dërguar kryeprokurori Zejnullah Gashi.
Sipas biografisë, Salihu ka mbi 16 vjet përvojë në sistemin e drejtësisë në Kosovë. Karrierën e nisi në 2010 si zyrtar i lartë për hetime dhe strategji në Agjencinë Kundër Korrupsionit. Më pas shërbeu në Zyrën e Prokurorit Disiplinor si inspektor i lartë gjyqësor.
Në shkurt 2018, mori udhëheqjen e Zyrës së Prokurorit Disiplinor gjatë ristrukturimeve ligjore për llogaridhënien në sistemin gjyqësor dhe prokurorial. Prej korrikut 2019, punoi si prokuror në Prokurorinë Themelore në Prishtinë. Në shkurt 2024, u emërua udhëheqës i Departamentit të Përgjithshëm, ndërsa në korrik 2024 avancoi në pozitën e Prokurorit të Krimeve të Rënda, duke u fokusuar në krimet ekonomike dhe korrupsion.
Salihu ka ndjekur trajnime profesionale në hetime dhe teknologji, si "Sekuestrimi dhe Konfiskimi i Pasurisë", "Specialised Judicial Training on Electronic Evidence" dhe "Cyber Awareness for Prosecutors Course".
Në të njëjtën mbledhje, Këshilli Prokurorial i Kosovës miratoi katër rregullore të ndryshuara sipas ligjeve të reja, midis të cilave:
- Rregullorja për Organizimin dhe Veprimtarinë e Këshillit Prokurorial të Kosovës;
- Rregullorja për Komisionin për Buxhet, Financave dhe Administrimin e Prokurorive.
Gjithashtu u themeluan komisione të reja.