Këshilli Prokurorial i Kosovës (KPK) ka thirrur mbledhje të jashtëzakonshme, në të cilën pritet të zgjidhet kryesuesi i ri. Kandidaturat për këtë pozicion i kanë paraqitur Arian Gashi, prokuror i Prokurorisë së Apelit, dhe Milot Krasniqi, prokuror i Prokurorisë Speciale. Zgjedhja pritet të bëhet me votim të fshehtë.
Të dy kandidatët kanë marrë mandatin si anëtarë të KPK-së para se të hynin në fuqi ndryshimet në Ligjin për KPK-në.
Milot Krasniqi është doktor i shkencave juridike në fushën e ndërmjetësimit në çështje penale. Ka qenë student i dalluar në Universitetin e Prishtinës. Ai ka shërbyer si zyrtar në Ministrinë e Kulturës, në Agjencinë Kundër Korrupsionit, si dhe ka ushtruar detyrën e prokurorit në Prokurorinë e Prizrenit. Si prokuror special, ka marrë pjesë në ekipe të përbashkëta hetimore me Shtetet e Bashkuara dhe përfaqëson Prokurorinë e Shtetit në programet e Eurojust-it. Krasniqi, së bashku me zëvendëskryeprokurorin Valdet Gashi, është autor i aktakuzës në rastin e "rezervave shtetërore".
Për sa i përket pozicionimit në konfliktet e fundit brenda KPK-së, Krasniqi ka qenë për shkarkimin e Besim Kelmendit nga detyra e kryeprokurorit të Shtetit dhe kundër certifikimit të Elza Bajrami-Kastratit si anëtare e KPK-së, deri në vendimin e Gjykatës Supreme që e certifikoi atë.
Arian Gashi njihet për frazën "Pesë minus pesë bëjnë zero", të shqiptuar kundër refuzimit të raportit për certifikimin e Elza Bajrami-Kastratit, të cilën e fitoi në gjyq. Gashi ka ngritur aktakuza kundër rasteve të korrupsionit si prokuror në Prokurorinë Themelore të Prishtinës.
Përditësime
Arian Gashi u zgjodh kryesues i KPK-së me 4 vota, ndërsa Milot Krasniqi mori 2 vota.
Mandati i tij fillon më 13 mars 2026.
Gashi dha dorëheqje nga posti i kryetarit të Komisionit për Çështje Normative.
Ai paraqiti platformën e tij, duke theksuar 14 vite përvojë dhe prioritetet: bashkëpunim, mbrojtje të parimeve, transparencë dhe meritokraci.
Dardan Vuniqi u nominua për zëvendëskryesues.