Arian Gashi u zgjodh kryesues i ri i Këshillit Prokurorial të Kosovës (KPK) në mbledhjen e jashtëzakonshme të së premtes. Zgjedhja u bë me votim të fshehtë, ku Gashi mori 4 vota për, ndërsa kundërkandidati i tij, prokurori special Milot Krasniqi, mori 2 vota.
Para votimit, të dy kandidatët mbajtën fjalime prezantuese para anëtarëve të KPK-së, ku paraqitën prioritetet dhe vizionin e tyre për drejtimin e institucionit.
Mandati i Gashit si kryesues fillon më 13 mars 2026 dhe zgjat deri në përfundimin e mandatit të tij si anëtar i KPK-së. Gashi u betua si anëtar në janar 2023 dhe ka qenë i përfshirë në përplasjet e fundit mes grupeve brenda këshillit, ku bashkë me tre anëtarë të tjerë kishte dalë kundër përbërjes së vjetër.
Në të njëjtën mbledhje pritet të zgjidhet edhe zëvendëskryesuesi, për të cilin kandidati i vetëm është Dardan Vuniqi.
Përditësime
Agron Qalaj konfirmoi votimin e Arian Gashit si kryesues i Këshillit Prokurorial të Kosovës dhe fillimin e mandatit më 13 mars 2026.
- Gashi u betua pas zgjedhjes: "Do ta ushtroj detyrën time me paanshmëri, transparencë dhe profesionalizëm të plotë."
- Gashi dha dorëheqjen menjëhershme nga posti i Kryetarit të Komisionit për Çështje Normative, e miratuar njëzëri.