Dardan Vuniqi u zgjodh zëvendëskryesues i Këshillit Prokurorial të Kosovës në mbledhjen e mbajtur më 13 mars 2026, me 6 vota për përmes votimit të hapur nga anëtarët e KPK-së. Mandati i tij fillon në të njëjtën datë dhe zgjat deri në përfundim të mandatit si anëtar i këtij këshilli.
Para votimit, Vuniqi prezantoi platformën e tij, duke theksuar angazhimin për rritjen e besimit të publikut në sistemin prokurorial dhe ushtrimin e kompetencave në përputhje me ligjin. Ai premtoi mbikëqyrje të punës së prokurorive, avancime të bazuara në transparencë, llogaridhënie dhe standarde ligjore.
Ndër prioritetet kryesore përmenden:
- Forcimi i mekanizmave të raportimit tremujor nga kryeprokurorët;
- Publikimi i raporteve periodike mbi punën e prokurorëve;
- Hartimi i analizave për rritjen e performancës së sistemit;
- Rekrutimi i stafit dhe prokurorëve sipas ndryshimeve të rregulloreve.
Vuniqi theksoi rëndësinë e planifikimit të resurseve njerëzore dhe bashkëpunimit ndër-institucional me partnerët vendorë e ndërkombëtarë për funksionim efikas e transparent të sistemit prokurorial. Pas zgjedhjes, ai falënderoi kolegët dhe premtoi ta marrë këtë detyrë si përgjegjësi për realizimin e planeve të përbashkëta.