Vëllezërit Alban dhe Olsi Eftimi janë thirrur në ambientet e Prokurorisë së Posaçme (SPAK) për të dhënë shpjegime para hetuesve të Byrosë Kombëtare të Hetimit. Paraqitja e tyre lidhet me dosjen hetimore ndaj ish-zëvendëskryeministres Belinda Balluku, në qendër të së cilës është vila nr. 188/1 në kompleksin “Green Coast” në Palasë, pronë e cila është vënë nën sekuestro preventive.
Sipas dokumenteve të administruara nga SPAK, studios së arkitekturës “Atelier 4”, të drejtuar nga vëllezërit Eftimi, i janë sekuestruar pajisje dhe dokumentacion. Hetimet janë fokusuar te komunikimet me email mes arkitektëve dhe Belinda Ballukut, ku diskutoheshin detaje të arredimit të brendshëm dhe eksteriorit, si pishina “infinity”, vaskat hidromasazhi dhe përdorimi i materialeve të kushtueshme si druri “teak” dhe mermeri. Një shënim i gjetur në dosje për punimet e pishinës referon një vlerë prej 25,000 eurosh dhe lidhje me emrin e biznesmenit Arbër Abazi, administrator i kompanisë “Alko Impex General Construction”.
Organi i akuzës dyshon se shpenzimet për këto punime, që variojnë nga 288 mijë deri në 410 mijë euro, janë mbuluar nga kompania “Alko Impex General Construction”, e cila rezulton të ketë përfituar kontrata publike, përfshirë një tender prej 2.2 miliardë lekësh për Unazën e Madhe të Tiranës. Hetimi po verifikon nëse ky financim përbën shpërblim për favorizime në tendera publikë. Ndaj Belinda Ballukut rëndojnë akuza për korrupsion pasiv, pastrim parash dhe shkelje të barazisë në tendera. Pas dhënies së dëshmisë, arkitekti Olsi Eftimi është larguar nga ambientet e SPAK-ut pas më shumë se një ore qëndrimi.
Përditësime
Arkitekti Alban Eftimi qëndroi për 5 orë në SPAK, duke sqaruar se dëshmia e tij zgjati dukshëm më shumë se ajo e vëllait. Hetuesit siguruan një e-mail të datës 14 shtator 2020, ku Eftimi i raportonte Belinda Ballukut mbi ecurinë e punimeve. Prokuroria zgjeroi akuzat ndaj ish-zv.kryeministres, duke shtuar atë të 'mosdeklarimit apo fshehjes së pasurisë' krahas hetimeve për korrupsion dhe pastrim parash.