Ish-futbollisti i Kombëtares shqiptare, Igli Tare, është paraqitur këtë të hënë në Prokurorinë e Posaçme (SPAK) nën shoqërinë e avokatit të tij. Tare është nën hetim për veprën penale të pastrimit të parave, në lidhje me dosjen e ish-zëvendëskryeministres Belinda Balluku.
Në qendër të verifikimeve janë dy vila në bregdetin e jugut, përkatësisht në Dhërmi dhe Palasë. Sipas hetimeve, pronat janë regjistruar në emër të Igli Tares, por dyshohet se ato janë në pronësi faktike të Belinda Ballukut. Hetuesit pretendojnë se ish-zyrtarja ka përdorur gjithashtu shefen e saj të kabinetit në Albcontrol, Joana Bushi, për të fshehur këto pasuri.
Njëra nga vilat, ajo në kompleksin White Rocks në Dhërmi, dyshohet të jetë përfituar si ryshfet për favorizimin e kompanisë Eurocol në dy tenderë për rikonstruksionin e godinës së Albcontrol-it, me vlerë mbi 1 milion euro. Sa i përket vilës në Palasë, prokuroria dyshon se ajo është përfituar në këmbim të favorizimit të kompanisë Alko Impex General Construction për lotin 7 të Unazës së Madhe të Tiranës. Dokumentet e sekuestruara nga SPAK, përfshirë komunikime elektronike me studion Atelier 4, zbardhin detaje për projektimin luksoz të vilës, e cila parashikonte pishinë dhe vaska hidromasazhi. Në kuadër të këtyre hetimeve, prokurorët kanë thirrur edhe vëllain e Igli Tares, Agron Tare.
Përditësime
Igli Tare u paraqit sot për herë të tretë në SPAK, ku u mor në pyetje për 5 orë në lidhje me hetimet për pasuritë e paluajtshme. Prokurorët zbardhën detaje mbi financimin e vilës në Palasë, duke saktësuar se Tare financoi fazën e karabinasë, ndërsa pjesën tjetër e mbuloi kompania Alko Impex e Arbër Abazit. Hetuesit siguruan e-maile të shtatorit 2020 mes studios Atelier 4 dhe Belinda Ballukut, të dërguara një muaj para nënshkrimit të kontratës nga Tare. Njëkohësisht, autoritetet konfirmuan masat e sigurisë ndaj Belinda Ballukut, përfshirë ndalimin e daljes jashtë vendit dhe pezullimin nga detyra.