Presidenti i Federatës Shqiptare të Futbollit (FSHF), Armand Duka, mori pjesë në mbrëmjen gala të organizuar nga Federata Greke e Futbollit me rastin e festimit të 100-vjetorit të themelimit të këtij institucioni sportiv. Ky jubile është cilësuar si një moment historik për zhvillimin e futbollit në Greqi.
Gjatë këtij eventi, kreu i FSHF-së i përcolli urimet e tij homologut grek, Chrysostomos Gkagkatsis, si dhe gjithë komunitetit të futbollit në shtetin fqinj. Në mesazhin e tij, Armand Duka vlerësoi historinë dhe kontributin e futbollit grek, duke e konsideruar këtë përvjetor si një vlerë që meriton të nderohet.
“Urime 100-vjetorin e themelimit Federata Greke e Futbollit! Një jubile i rëndësishëm për futbollin grek dhe një histori e pasur për t’u duartrokitur e nderuar. Urimet më të përzemërta Presidentit Chrysostomos Gkagkatsis, si edhe të gjithë familjes së futbollit grek. Gëzuar 100-vjetorin!”, shkruan Armand Duka në mesazhin e tij.
Pjesëmarrja e presidentit të FSHF në këtë ceremoni shihet si dëshmi e marrëdhënieve dhe bashkëpunimit të vazhdueshëm mes institucioneve të futbollit të të dyja vendeve. Ky aktivitet është zhvilluar në kuadër të lidhjeve rajonale dhe evropiane që ekzistojnë midis federatave të futbollit.