Dy shtetas të Republikës së Kosovës, të identifikuar me inicialet F.R. (30) dhe T.T. (44), janë arrestuar në Shkup nën dyshimin për kryerjen e veprës penale të falsifikimit të parave, sipas nenit 268 të Kodit Penal. Operacioni policor u zhvillua më 3 gusht 2026 nga Njësiti i Policisë Intervenuese pranë SPB Shkup.
Sipas njoftimit zyrtar nga Ministria e Punëve të Brendshme, arrestimi ndodhi gjatë një kontrolli të një automjeti të tipit Golf, në të cilin udhëtonin të dyshuarit. Gjatë kontrollit, efektivët gjetën një sasi të madhe kartëmonedhash në valuta të ndryshme, përfshirë euro, dollarë amerikanë, franga zvicerane dhe paund britanikë. Vlera totale e parave të sekuestruara llogaritet të jetë rreth 230 mijë euro.
Pas ndalimit, personat janë shoqëruar në Stacionin Policor Qendër për procedura të mëtejshme hetimore. Paratë janë konfiskuar dhe dërguar për ekspertizë. Autoritetet policore njoftuan se, pas dokumentimit të plotë të rastit dhe në bashkërendim me prokurorin publik, ndaj dy shtetasve kosovarë do të parashtrohet kallëzim përkatës penal.