Prokuroria Themelore në Prishtinë, përmes Departamentit për Krime të Rënda, në bashkëpunim me Policinë e Kosovës, ka ndaluar për 48 orë dy persona me inicialet M.M. dhe Z.J.. Njëri është kosovar, ndërsa tjetri shtetas i Serbisë. Kjo ka ndodhur pas një hetimi disamujor.
Të dyshuarit dyshohen se, në bashkëpunim me persona të tjerë, kanë kryer veprat penale mashtrim sipas nenit 323, falsifikim i dokumenteve sipas nenit 390 dhe legalizim i përmbajtjes së rreme sipas nenit 395 të Kodit Penal të Republikës së Kosovës.
Rasti lidhet me një pronë të paluajtshme në Veternik me sipërfaqe 56 ari. Dyshohet se janë përdorur dokumente të falsifikuara për përfitim të kundërligjshëm.
Gjatë veprimeve hetimore u sekuestruan:
- një veturë në vlerë 50.000-60.000 euro;
- 20.000 euro para të gatshme;
- dokumente të ndryshme pronësore të dyshuara si të falsifikuara;
- katër telefona celularë si prova materiale.
Prokuroria Themelore në Prishtinë do të ndërmarrë veprimet e mëtejshme ligjore ndaj të dyshuarve. Hetimet vazhdojnë në koordinim me Policinë e Kosovës për zbardhjen e plotë të rastit.