Policia e Kosovës, në bashkëpunim me Drejtoria për Hetimin e Krimeve Ekonomike dhe Korrupsionit (DHKEK), më 2 prill 2026 ka intervistuar dhe ndaluar për 48 orë personin me inicialet B.L. (1990) në Ferizaj.
I dyshuari akuzohet për veprat penale "Mashtrim", "Falsifikim i dokumenteve" dhe "Legalizim i përmbajtjes së rreme", të kryera në bashkëpunim me persona të tjerë. Hetimet kanë zbuluar se të dyshuarit kanë falsifikuar dokumente identifikimi dhe certifikatë pronësie të një pale ankuese, duke tjetërsuar në mënyrë të kundërligjshme një pronë me sipërfaqe 7 hektarësh në komunën e Ferizajt. Vlera e përafërt e kësaj prone në treg është rreth 3 milionë euro.
Pas tjetërsimit, prona është parcelizuar dhe shitur te persona të tretë. Në kuadër të hetimeve, me urdhër të gjykatës u krye bastisje në një lokacion, ku u sekuestruan një telefon mobil dhe dokumente të lidhura me rastin.
Policia rikujton se më 19 shkurt 2026 u arrestuan katër persona të tjerë, të cilët dyshohen për përfshirje në këtë skemë kriminale. Hetimet vazhdojnë, ndërsa autoritetet theksojnë përkushtimin për luftën kundër krimit dhe sigurimin e sundimit të ligjit.