Policia e Kosovës, përmes Drejtorisë për Hetimin e Krimeve Ekonomike dhe Korrupsionit, në bashkëpunim me Prokurorinë Speciale të Republikës së Kosovës, ka arrestuar një person të dyshuar për pastrim parash në vlerë mbi 2 milionë euro.
Hetimet zhvillohen ndaj gjashtë personave të dyshuar, meshkuj kosovarë, të cilët dyshohen se në bashkëveprim kanë kryer veprën penale të mashtrimit. Sipas autoriteteve, të dyshuarit kanë mashtruar qytetarë të Kosovës në vazhdimësi nga viti 2015 deri në vitin 2019, përmes shitjes së avio-biletave. Për këto veprime janë ngritur kallëzime penale në prokuroritë përkatëse.
Gjatë hetimeve, policia ka siguruar dëshmi se njëri nga të dyshuarit, i përfshirë në mashtrime, ka kryer edhe pastrim parash përmes kompanive të kontrolluara prej tij. Këto kompani rezultojnë të jenë në pronësi të personit të arrestuar. Vlera totale e parave të pastruara tejkalon 2 milionë euro.
Hetimet financiare kanë zbuluar se i dyshuari ka bërë deponime në para të gatshme mbi 800 mijë euro, për të cilat nuk është dëshmuar prejardhja dhe nuk justifikohen me aktivitetin e tij ekonomik të deklaruar.
Pas intervistimit në prani të avokatit mbrojtës, prokurori ka lëshuar vendim për ndalimin e të dyshuarit për 48 orë.