Prokuroria Themelore në Prishtinë, Departamenti për Krime të Rënda – Njësiti për Hetimin e Krimeve Ekonomike dhe Korrupsionit, në bashkëpunim me Policinë e Kosovës, ka zhvilluar sot në orët e hershme të mëngjesit një aksion në Agjencinë Kadastrale të Kosovës dhe në disa lokacione të tjera. Aksioni bazohet në urdhëresën e Gjykatës Themelore në Prishtinë për kontroll ndaj të dyshuarve.
Si rezultat i këtij operacioni, janë ndaluar për 48 orë pesë persona me inicialet A.Q., N.K., A.B., B.Sh. dhe M.B.. Të dyshuarit akuzohen në bashkëkryerje për veprat penale "Keqpërdorimi i detyrës zyrtare apo autoritetit zyrtar" sipas nenit 414, "Falsifikimi i dokumenteve" sipas nenit 390 dhe "Legalizimi i përmbajtjes së rreme" sipas nenit 395 të Kodit Penal të Republikës së Kosovës.
Sipas hetimeve paraprake, A.Q. dhe N.K. kanë përdorur një dokument të falsifikuar, titulluar "Kontratë për këmbim e paluajtshmërive" të datës 11.02.1966, për të paraqitur në mënyrë të rreme një këmbim prone me qëllim përfitimin e kundërligjshëm pasuror. Ky dokument nuk ka ekzistuar në evidencat zyrtare.
A.B., në cilësinë e zyrtarit në Gjykatën Themelore në Prishtinë, dyshohet se ka keqpërdorur detyrën duke krijuar dosje fiktive, vulosur dhe përfshirë dokumentin e falsifikuar në arkivat e gjykatës, për të mundësuar legalizimin e tij. Ndërkaq, B.Sh. dhe M.B., zyrtarë në Agjencinë Kadastrale të Kosovës, dyshohen se kanë tejkaluar kompetencat duke aprovuar ankesën e N.K. dhe regjistruar pronën në mënyrë të paligjshme.
Prokurori i Shtetit pritet të vendosë brenda afatit ligjor për caktimin e masave të sigurisë në procedurën penale ndaj të pandehurve. Prokuroria Themelore në Prishtinë thekson përkushtimin e saj ndaj luftës kundër kriminalitetit dhe forcimit të sundimit të ligjit.