Autoritetet e sigurisë në Kosovë kanë goditur një skemë të dyshuar korruptive që mundësonte pajisjen e shtetasve të huaj me leje qëndrimi në mënyrë të kundërligjshme. Operacioni u zhvillua më 22 korrik pas një hetimi disamujor të ndërmarrë nga Policia e Kosovës dhe Agjencia e Kosovës për Inteligjencë (AKI), në bashkëpunim me Prokurorinë Themelore në Prishtinë.
Në pranga kanë përfunduar zyrtarë të administratës nga Divizioni për të Huaj dhe Agjencia e Regjistrimit Civil (ARC). Të dyshuarit e identifikuar janë Gylsen Jahiri dhe Fatma Shufta, të cilët akuzohen se kanë shfrytëzuar pozitat e tyre zyrtare për të shmangur procedurat ligjore për lëshimin e dokumenteve. Në këtë skemë është përfshirë edhe shtetasi Dervis Keleci, pronar i një biznesi, i cili dyshohet se ka falsifikuar dokumentacionin e aplikantëve dhe ka dhënë ryshfet.
Ministri në detyr në detyrë i Punëve të Brendshme, Xhelal Sveçla, ka përshëndetur aksionin, duke theksuar se ruajtja e integritetit institucional dhe lufta kundër korrupsionit janë prioritete. Ai shtoi se asnjë zyrtar nuk do të lejohet të përdorë pozitën për përfitime personale në dëm të interesit publik.
Sipas informacioneve nga Prokuroria Themelore në Prishtinë, të dyshuarit po hetohen për veprat penale:
• Keqpërdorim i pozitës apo autoritetit zyrtar
• Marrje dhe dhënie e ryshfetit
• Falsifikim i dokumenteve zyrtare
Një person tjetër, Elvire Krasniqi Qerka, është proceduar në këtë rast dhe është liruar në procedurë të rregullt. Organet e rendit kanë sekuestruar prova materiale dhe elektronike, të cilat do t'i nënshtrohen ekspertizës. Hetimet po vazhdojnë për të zbardhur periudhën kohore të këtij aktiviteti dhe vlerën e saktë të përfitimeve financiare.