Një operacion i koordinuar ndërmjet Polisisë së Kosovës dhe Agjencisë së Kosovës për Inteligjencë (AKI) ka rezultuar me arrestimin e katër personave, nën dyshimin për kryerjen e veprave penale të keqpërdorimit të detyrës zyrtare dhe korrupsionit.
Sipas njoftimit të ministrit në detyrë të Punëve të Brendshme, Xhelal Sveçla, të dyshuarit kanë shfrytëzuar pozitat e tyre institucionale dhe rolet si ndërmjetës për t'u ofruar shërbime palëve të treta, duke anashkaluar procedurat ligjore në këmbim të përfitimeve financiare.
Në mesin e të arrestuarve janë:
• 2 zyrtarë të Divizionit për të Huaj;
• 1 zyrtar i Agjencisë së Regjistrimit Civil;
• 1 shtetas i huaj.
Ministri Sveçla ka mirëpritur këtë aksion, duke theksuar se lufta kundër korrupsionit dhe mbrojtja e integritetit institucional mbeten prioritete kryesore. Ai deklaroi se çdo dyshim për cenim të besimit të qytetarëve do të trajtohet me seriozitet të plotë në bashkëpunim me organet e drejtësisë. Sipas tij, askush nuk do të lejohet të shfrytëzojë funksionin publik për përfitime personale në dëm të interesit publik dhe të drejtave të qytetarëve për trajtim të barabartë.