Ministri i Punëve të Brendshme, Xhelal Sveçla, ka konfirmuar përfundimin e një operacioni të gjerë të institucioneve të drejtësisë dhe sigurisë, që ka rezultuar me arrestimin e gjashtë personave të dyshuar për krime të kryera gjatë periudhës së luftës. Sipas njoftimit, pesë nga të arrestuarit dyshohen për përfshirje në masakrën e Reçakut, ndërsa personi i gjashtë po hetohet për vrasjen e civilëve në Ponesh të Gjilanit.
Në një reagim publik, ministri Sveçla ka vlerësuar punën e Policisë së Kosovës, Prokurorisë Speciale dhe Agjencisë Kosovare të Inteligjencës (AKI) për zbatimin e këtij operacioni. Ai theksoi se angazhimi për zbardhjen e krimeve të luftës ka shënuar rritje të ndjeshme, duke u mbështetur në fuqizimin e kapaciteteve hetuese.
Sipas ministrit, sektori për hetimin e krimeve të luftës brenda Policisë së Kosovës është shndërruar në drejtori, ndërsa numri i personelit të angazhuar është dyfishuar. Sveçla ritheksoi qëndrimin se nuk do të ketë kompromis për autorët e krimeve, duke shtuar se vendosja e drejtësisë mbetet detyrim institucional dhe moral. Ministri shtoi se hetimi i këtyre rasteve është thelbësor për të vërtetën historike dhe për të parandaluar përsëritjen e krimeve të së kaluarës.