Ministri në detyrë i Punëve të Brendshme, Xhelal Sveçla, ka deklaruar se institucionet e sigurisë janë duke trajtuar me seriozitet ankesën e Nenad Rashkoviqit. Sipas tij, mekanizmat mbikëqyrës janë funksionalë dhe garantojnë llogaridhënie brenda Polocisë së Kosovës, e cila gëzon besueshmëri të lartë te qytetarët. Pas vlerësimit fillestar të Inspektoratit Policor të Kosovës (IPK), dy efektivë janë pezulluar, ndërsa procesi hetimor mbetet i hapur deri në sqarimin e plotë të rrethanave.
Në një reagim ndaj deklarimeve të presidentit të Serbisë, Aleksandar Vuçiç, ministri Sveçla i cilësoi qëndrimet e këtij të fundit si të papranueshme. Ai theksoi se përdorimi i rastit Rashkoviq shërben si strategji për të minuar veprimet e shtetit të Serbisë gjatë luftës së fundit në Kosovë dhe për të zhvendosur vëmendjen nga zbulimet e rënda në veri të vendit, ku janë gjetur tri varreza masive dhe 71 armë të gjata.
Sipas Sveçlës, në vend të retorikës politike, Vuçiç duhet të tregojë gatishmëri për bashkëpunim duke hapur arkivat shtetërore të Serbisë, të cilat do të ndihmonin në zbardhjen e fatit të personave të zhdukur me dhunë. Ministri në detyrë ka garantuar se institucionet e Kosovës do t’i çojnë deri në fund hetimet për të dyja çështjet dhe do t’i njoftojnë rezultatet për opinionin publik.