Prokuroria Themelore në Prishtinë, përmes Departamentit për Krime të Rënda dhe Njësitit për Krime Ekonomike dhe Korrupsion, ka njoftuar se pas hetimeve disamujore dhe zbatimit të masave të veçanta hetimore, ka ndaluar tre persona për vepra të ndryshme penale. Aksioni është realizuar në bashkëpunim me Policinë e Kosovës dhe Agjencinë e Kosovës për Inteligjencë (AKI).
Dy nga të ndaluarit, me inicialet F.Sh. dhe G.J., janë zyrtarë në Ministrinë e Punëve të Brendshme, përkatësisht në Divizionin për të Huaj dhe në Agjencinë e Regjistrimit Civil (ARC). Ata dyshohen për veprën penale "Keqpërdorim i detyrës apo autoritetit zyrtar", pasi dyshohet se në bashkëkryerje kanë lëshuar leje qëndrimi për shtetas të huaj në mënyrë të kundërligjshme, duke përfituar dobi pasurore.
Personi i tretë i ndaluar, me inicialet D.K., dyshohet për veprën penale "Falsifikimi i dokumentit". Sipas hetimeve, ky i fundit akuzohet se ka falsifikuar dokumente të ndryshme për të mundësuar aplikimin dhe pajisjen e paligjshme të personave të tjerë me leje qëndrimi në Republikën e Kosovës.
Të tre të dyshuarit janë ndaluar për 48 orë me urdhër të Prokurorit të Shtetit. Prokuroria ka bërë të ditur se do të shqyrtojë paraqitjen e kërkesës për caktimin e masave të sigurisë ndaj tyre, në përputhje me dispozitat e Kodit të Procedurës Penale.