Shërbimet e Drejtorisë Vendore për Kufirin dhe Migracionin Shkodër kanë zhvilluar një operacion për goditjen e veprimtarisë së dhënies ndihmë shtetasve të huaj për kalim të paligjshëm të kufirit shtetëror. Si rezultat i këtij operacioni, të koduar “Transit 2”, autoritetet arrestuan në flagrancë dy shtetas të huaj, të cilët u ndaluan teksa udhëtonin me një automjet në aksin rrugor Shkodër-Hani i Hotit.
Personat e ndaluar janë shtetasi azerbajxhanas M. A., 59 vjeç, dhe shtetasi turk C. D., 36 vjeç. Sipas njoftimit të Policisë, C. D. ishte drejtues i automjetit, ndërsa M. A., i cili ishte pronari i mjetit, ndodhej në pozicionin e pasagjerit. Gjatë kontrollit, në brendësi të automjetit u gjetën 4 shtetas nga Afganistani, të cilët, sipas hetimeve paraprake, po transportoheshin drejt kufirit me Malin e Zi kundrejt një pagese të caktuar.
Automjeti i përdorur për këtë aktivitet është sekuestruar në cilësinë e provës materiale. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme penale.