Policia e Mitrovicës së Jugut arrestoi dy të dyshuar për posedim dhe shitje të narkotikëve më 29 mars.
Bazuar në informacione operative dhe dyshime të arsyeshme, policia lokalizoi dhe identifikoi një mashkull të dyshuar për shitje të paautorizuar të narkotikëve. Ai u arrestua në flagrancë, ndërsa gjatë kontrollit fillestar iu gjetën dhe iu sekuestruan 10.4 gramë substancë e dyshuar narkotike e llojit marihuanë.
Në vijim të veprimeve hetimore dhe me autorizim të prokurorit, u krye kontroll në shtëpinë e të dyshuarit. Gjatë kontrollit trupor të një femre tjetër, u gjet dhe u sekuestrua 1.5 gramë substancë e dyshuar narkotike e llojit kokainë.
Pas procedurave të nevojshme:
- Ndaj të dyshuarës femër u iniciua rasti penal për "Posedimi i paautorizuar i narkotikëve".
- Ndaj të dyshuarit mashkull u iniciua rasti për "Blerja, posedimi, shpërndarja dhe shitja e paautorizuar e narkotikëve".
Me vendim të prokurorit, e dyshuara femër u lirua në procedurë të rregullt, ndërsa i dyshuari mashkull u ndalua për 48 orë në polici.