Njësia e Hetimeve të Stacionit Policor në Viti arrestoi më 15 janar 2026 dy persona të dyshuar meshkuj kosovarë, M.J. (lindur 2002) dhe B.K. (lindur 2006), për përfshirje në vjedhje të rënda në tri institucione arsimore në komunën e Vitisë.
Të dyshuarit dyshohen se në bashkëveprim në tri lokacione kanë vjedhur sasi të konsiderueshme pajisjesh dhe mjetesh, përfshirë laptopë, iPad, projektorë, pajisje të tjera teknologjie dhe mjete pune.
Me urdhër të gjykatës, u kryen kontrolle në dy lokacione, ku u gjetën dhe u konfiskuan dëshmi materiale të dyshuara të vjedhura. Pas verifikimeve, këto sende u ndërlidhën me rastet e vjedhjeve.
Të dyshuarit u intervistuan në prani të avokatëve mbrojtës dhe, me vendim të Prokurorit të Shtetit, u dërguan në mbajtje për 48 orë.